John Cena: Rekordi i 17 titujve botërorë ishte më i rëndësishëm për WWE-në se për mua

John Cena ka folur hapur për momentin kur fitoi titullin e 17-të botëror, duke pranuar se thyerja e rekordit të Ric Flair kishte më shumë peshë për WWE-në dhe wrestling-un sesa për të personalisht. Cena u bë kampion bote për herë të 17-të vitin e kaluar, pasi mposhti Cody Rhodes në WrestleMania 2025. Me këtë fitore, ai kaloi rekordin e Ric Flair, i cili kishte fituar 16 tituj botërorë. Gjatë një prononcimi në FanX Comic Conventions, Cena shpjegoi se për të ky nuk ishte thjesht një rekord personal, por një moment historik për biznesin e wrestling-ut. “17-a kalon rekordin e vendosur nga Nature Boy Ric Flair. Është një moment historik, por personalisht mendoj se ishte më i rëndësishëm për WWE-në. Mendoj se ishte më i rëndësishëm për wrestling-un. Në konferencën për shtyp të Royal Rumble thashë: ‘Më në fund jam serioz për të ndjekur 17-ën.’ Arsyeja pse doja ta arrija ishte për të treguar se është e mundur. Dhe dua të jem këtu për t’i shtrënguar dorën personit që do të fitojë 18-ën. Pra, ishte bukur”, tha Cena. Ish-kampioni theksoi se tani u takon yjeve të rinj të WWE-së të synojnë rekordin që ai vendosi. Cena beson se talentet e rinj kanë mundësinë për të fituar 17 ose edhe 18 tituj botërorë, nëse punojnë fort dhe shfrytëzojnë mundësitë e tyre. “Është shumë më me ndikim për WWE-në. Tani kemi kaq shumë talente të rinj që kanë realisht një mundësi, nëse luajnë siç duhet letrat e tyre, punojnë fort dhe japin gjithçka. Ata mund të fitojnë 17, 18 tituj. Me të vërtetë mezi pres ditën kur do t’i shtrëngoj dorën personit që do ta kalojë atë rekord”, shtoi legjenda. Cena pranoi se nuk ishte gjithmonë i sigurt nëse do ta thyente rekordin, kryesisht për shkak të dashurisë dhe respektit që ka për Flair. Mundësia për ta arritur këtë objektiv mund të kishte ardhur disa vite më herët, pasi ai ishte planifikuar të fitonte titullin në ndeshjen kundër Roman Reigns në vitin 2021. Planet ndryshuan dhe Cena e arriti rekordin vetëm në muajt e fundit të tij në WWE, duke i dhënë karrierës një fund si në përralla.