Penta paralajmëron Roman Reigns: “Nuk je përballur kurrë me dikë si unë”

Roman Reigns vazhdon mbretërimin e tij si World Heavyweight Champion, por Penta beson se mund të jetë pikërisht ai që do t’i japë fund dominimit të Tribal Chief. Pas SummerSlam, Rey Mysterio njoftoi organizimin e një turneu me luchadorë nga RAW, SmackDown, AAA dhe NXT. Fituesi do të sigurojë mundësinë për t’u përballur me Roman Reigns për World Heavyweight Championship në episodin e RAW më 14 shtator në Mexico City. Penta e nisi turneun me fitore, duke mposhtur Laredo Kid në raundin e parë në RAW. Pas fitores, ai u shfaq në episodin e kësaj jave të AAA Lucha Libre, ku nuk ngurroi t’i dërgonte një mesazh të drejtpërdrejtë Roman Reigns. “Nuk je përballur kurrë me një wrestler si Penta. Nuk ke pasur kurrë përballë një njeri si Penta, një njeri që ka luftuar për gjithçka, madje edhe për jetën e tij, për të arritur gjithçka që kam arritur në karrierën time.” Penta më pas iu referua edhe familjes dhe grupeve që kanë qëndruar pranë Roman Reigns gjatë karrierës së tij. “Roman, mua nuk më është dashur kurrë një familje, një faction apo një grup për të arritur objektivat e mia. Penta ka luftuar për veten dhe për të gjithë njerëzit e tij. Ky është Penta.” Në fund, luchadori tregoi respekt për Reigns si wrestler, por premtoi se nëse fiton turneun, do të shkojë në Mexico City për t’i treguar kampionit se kush është në të vërtetë Penta. “Të respektoj si wrestler, por kur ta fitoj këtë turne, do të shkoj direkt në Mexico City. Do të të shoh sy më sy dhe do të të tregoj se kush është Penta.” Penta duhet fillimisht të përfundojë me sukses turneun për ta bërë realitet këtë përballje. Nëse ia del, Roman Reigns vs. Penta për World Heavyweight Championship në Mexico City mund të jetë një nga ndeshjet më interesante të RAW më 14 shtator.